حـلـم بـأثـر رجـعـي

01/01/1970 - 2:33 am - ماجد عبد العزيز غانم

أنباء الوطن -

..... تعال جاي معك  اسبوعين  وبالكثير ثلاثة بدك تلِم جماعتك وتقرروا هالقانون ونخلص من هالسالفة

..... حاضر يا  سيدي ولا يهمك يمكن كمان اقل من اسبوعين بكون جاهز ... بس يا  سيدي انت ليش مستعجل على مهل بنصدر القانون ما انت عارف عمرنا ما قدمنا لجماعتنا قانون إلا وقرروه يعني الجماعة في الجيبة زي كل مرة يا سيدي !

..... انا عارفك وعارف جماعتك ما بتقصروا جربتكوا كثير وكنتوا مثل ما بدي بس المشكلة مش انا اللي مستعجل هاي المرة ، شو اقول  قرايبنا جَهدوا بَلاي  وهم اللي  مستعجلين أكثر مني  بدهم يشتغلوا وهاظا القانون بيفيدهم كثير وبيسهل شغلهم  فهمت هسه

....... طيب حاضر على طول بس انت نسيت يا سيدي إنّو جماعتي عندهم  اجازة هسه

....... بعرف وأنا قطعت إجازتهم وبكره هم مداومين خلص لا تظلك تعلch  بالحكي زهقتني  ما بيكفي زَهقِت الناس منك صارلك زمان بتشتغل  عندي عن جد زهقوك  كل يوم بيصَلنِي  حكي عليك وانا بطنش وبقول الزلمة مش مقصر معي لا تخليني أغيِّر رايي فيك ، ترى ميت واحد بتمنى يشتغل محلك ، روح اعمل مثل ما قلتلك بدون كثرة حكي

 

( قبل ما اصحى من النوم بشوي )  ....

 

...... ها يا سيدي كيف  أنا معك قلتلك الجماعة مضمونين في الجيبة هي قرروا  القانون بيوم واحد حتى اللي كانوا مش موافقين الصبح زبطناهم ووافقوا قبل المغرب كيفني معك يا سيدي تمام

...... خلاص اسكت بعرف انهم وافقوا  المهم خلَص هسه انت بتلم حوايجك وبتروح ما بدي اشوفك بعد اليوم  بيكفي انت تعبت وانا كمان تعبت منك

......... بس يا سيدي بيجوز لسه في كمان قوانين عندك ما بدنا نقررهن ؟

......... حتى لو في قوانين بنقررهن بعدين بس اجيب واحد غيرك خلص أنا قلت انك تعبت يعني تعبت فهمت ولا إنت بتعرف حالك أكثر مني !

........ لا يا سيدي أعوذ بالله انت بتعرف مصلحتي اكثر مني بعرِف  حاضر يا سيدي حاضر قبل المغرب بكون في داري ... طيب بس يا سيدي وجماعتنا اللي قرروا  القانون ؟

....... وانت شو خصَّك فيهم هاظا شغلي والا بدك تعلمني شغلي كمان  اما موظفين آخر زمن خلص عاد يلا روِّح

...... لا يا سيدي حقك علي انا قصدي انهم بدهم يظلوا مداومين ولا بدهم يرجعوا يعَطلُوا ؟

....... وبعدين معك خلص ، جماعتك اليوم المسا اِلهُم حفلة تخريج لانهم كملوا قراية خلص بتقدر تهنيهم بالتخريج بس في دورهم مش عندي هون ... يلّا مع السلامة

وكل حلم وانتوا بخير يلا كمان انتو كملتوا قراية ؟ مش كل واحد يقعد يفسر حلمي على كيفوا هاظا حلمي أنا ، وأنا الكل بعرفني  لما بنام وبحلم مثل ما بيقولوا المصريين ماعرفش ابويا ، يلا  كل واحد منكوا يروح يشوفلوا شغلة بلاش اعمَلِلّكوا حفلة تخريج

 

ماجد عبد العزيز غانم 
جرش  / 0772675691 
majeduothman@yahoo.com
29/5/2016