الخصاونة يكتب : كيف بدنا نستقبلهم
بقلم / محمد فواز الخصاونه
منذ أن سمعت ان الوزراء يقومون بزيارات للمحافظات وانا أفكر من هم الوزراء الذي ممكن أن نستقبلهم بالزرقاء ويكون لهم قبول شعبي والقدوم على ترويج قانون جائر على جيوب المواطنين فمثلا لو حكينا وزير البلديات بالوفد كيف بدو يجي والوضع ببلدية الزرقاء وباقي بلديات المحافظة كل الاردن وبجوز الدول المجاوره بتسمع فيه ولو حكينا وزير الشباب معهم مثلا كيف بدو يجي وشو بدو يحكي لمحافظة فيها من اكبر نسب البطاله في الاردن ولو حكينا وزير البيئة مثلا بدو يجي كيف بدو يجي واحنا عنا من اكبر مناطق التلوث البيئي بالعالم ولو حكينا بدو يجي وزير المياه كيف بدو يجي ونص مناطق الزرقاء بتوصلها المياه يوم بالأسبوع ولو بدو يجي وزير الطاقه كيف بدو يحكي مع الحضور وكلهم عليهم ست سبع فواتير مستحقه وكيف بدو يجي وزير التنميه الاجتماعية ورح يلاقي ع اقل اشاره بالزرقاء ٣٠ متسول من الفقر و الجوع وسوى الرعاية ولا كيف بدو يجي وزير التعليم ويسمع انه في مدارس عدد الطلاب بالصف الواحد تجاوز ٦٠ طالب وأما بالنسبه لوزير النقل اعتقد انه رح يعتذر لانه مشكلته رح تبدأ من جسر ماركا واذا علق بالازمه طار الاجتماع .....
بصراحه حاولت أحلل اللقاء واجهز كلام بصفتي شاب منتخب عن محافظة اقل ما يمكن تسميتها بالمظلومه وهي لا تبعد عن العاصمه ٢٠ كيلو حيث ينقصها الكثير الكثير من الخدمات بكافة المجالات و القطاعات فكيف لهذا الوفد القادم للمحافظة للحديث مع اهلها عن قانون الضريبة التي طالما دفعها اهل الزرقاء و الوطن ولا يأخذ مقابلها أدنى حقوقه بالخدمات ، كيف سيتحدث الوفد مع الحضور وأغلبه عاطل عن العمل وكيف سيقنع الوفد الحضور اذا كان بينهم اب ينتظر قبول ابنه بالجامعه ولا يملك حتى رسوم تسجيل ولا حتى ثلاث ساعات فيبحث عن قرض من هنا وهناك ، كيف سيناقش الوفد المحافظة التي بها اكبر عدد مصانع و شركات في الاردن ويخبروهم بأن القانون الجديد سيخضع التصدير و المناطق الحره فتهاجر الاستثمارات وتزداد البطاله ....
وأما بالنسبه لموقفي الشخصي من هذا القانون وبصفتي مقرر اللجنه المالية بمجلس محافظة الزرقاء ومستشار مالي و ضريبي للعديد من الشركات فإني ارى قبل الخوض بالقانون و التعديلات عليه علينا ان نقارن الخدمات المقدمة مقابل الضرائب المدفوعة و ان نقارن الرواتب ونسب البطاله بمعدل ما ندفع من الضريبه العامه على المبيعات بكافة القطاعات وعلينا ان نبحث أين ذهبت الضرائب السابقه وما هو سبب المديونيه وبعدها نخوض بالنسب و الاعفاءات و التعديلات على قانون يرتكز على جيب المواطن وفِي الختام اسال الله الخير لهذا الوطن وان يسخر له الاوفياء من ابناءه
محمد فواز الخصاونه
عضو مجلس محافظة الزرقاء
مقرر اللجنه الماليه و الاستثماريه
